ഉച്ചയ്‌ക്കു രണ്ടരയോടെ പരിശുദ്ധ കാതോലിക്ക ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ ബാവ ആശുപത്രി ചാപ്പലിലെത്തി പ്രാര്‍ഥിച്ചു. മൂന്നുമണിക്ക്‌ മുഖ്യമന്ത്രി ഉമ്മന്‍ ചാണ്ടി, വി.പി. സജീന്ദ്രന്‍ എം.എല്‍.എ. എന്നിവര്‍ അന്തിമോപചാരമര്‍പ്പിച്ചു. മൂന്നരയോടെ ഭൗതികശരീരം വിലാപയാത്രയായി കോലഞ്ചേരി കാതോലിക്കേറ്റ് സെന്ററിലെത്തിച്ച്‌ പൊതുദര്‍ശനത്തിനുവച്ചു. വൈകിട്ട്‌ 6.45-ന്‌ ഭൗതികശരീരം വിലാപയാത്രയായി കോട്ടയം പഴയ സെമിനാരിയിലെത്തിച്ചു. ഇന്നു രാവിലെ ശുശ്രൂഷകള്‍ക്കുശേഷം വിലാപയാത്രയായി തിരുവല്ല, ചെങ്ങന്നൂര്‍, പന്തളം, അടൂര്‍ വഴി പത്തനാപുരം മൗണ്ട്‌ താബോര്‍ ദയറായിലേക്കു കൊണ്ടുപോകും. നാളെ ഉച്ചകഴിഞ്ഞ്‌ രണ്ടിന്‌ പത്തനാപുരം മൗണ്ട്‌ താബോര്‍ ദയറാ ചാപ്പലില്‍ ബസേലിയോസ്‌ ദിദിമോസ്‌ പ്രഥമന്‍ വലിയ ബാവായുടെയും ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ കാതോലിക്കാ ബാവായുടെയും പ്രധാന കാര്‍മികത്വത്തിലും സഭയിലെ മറ്റ്‌ മെത്രാപ്പോലീത്താമാരുടെസഹകാര്‍മികത്വത്തിലും കബറടക്ക ശുശ്രൂഷ നടക്കും. ഇന്നലെ വൈകിട്ട്‌ കോട്ടയം പഴയ സെമിനാരിയില്‍ എത്തിച്ച ഭൗതികശരീരത്തില്‍ അന്തിമോപചാരമര്‍പ്പിക്കാന്‍ വന്‍ ജനാവലിയാണ്‌ എത്തിയത്‌.
1939 മേയ്‌ 8 ന്‌ തിരുവല്ലാ മേപ്രാല്‍ കണിയാന്തറ കുടുംബത്തില്‍ ജനിച്ച മെത്രാപ്പോലീത്ത 16-ാം വയസില്‍ പത്തനാപുരം മൗണ്ട്‌ താബോര്‍ ആശ്രമാംഗമായി. ആശ്രമ സ്‌ഥാപകന്‍ തോമാ മാര്‍ ദിവന്നാസിയോസിന്റെ ശിക്ഷണത്തില്‍ സന്യാസവ്രതം സ്വീകരിച്ചു. 1991 ഏപ്രില്‍ 30 ന്‌ ഡല്‍ഹി ഭദ്രാസന സഹായമെത്രാപ്പോലീത്തയും 1996 ല്‍ മെത്രാപ്പോലീത്തയായി. ഭദ്രാസന ഭരണത്തോടൊപ്പം വിവിധ സാമൂഹിക സേവന പദ്ധതികള്‍ നടപ്പിലാക്കാന്‍ നേതൃത്വം നല്‍കി.
