കോലഞ്ചേരി പള്ളിയില്‍ ഭരണഘടനപ്രകാരം തെരഞ്ഞെടുപ്പിനു തയാര്‍ : മലങ്കരസഭ

സെന്റ് പീറ്റേഴ്സ് ആന്റ് സെന്റ് പോള്‍സ് പള്ളിയില്‍ കോടതിവിധി മാനിച്ച് സമാധാന അന്തരീക്ഷം പുന:സ്ഥാപിച്ചാല്‍ എത്രയും വേഗം സഭാ ഭരണഘടന അനുസരിച്ച് പൊതുയോഗം വിളിച്ച് തെരഞ്ഞെടുപ്പ് നടത്താന്‍ തയ്യാറാണെന്ന് ഓര്‍ത്തഡോക്സ് സഭാ വൈദിക ട്രസ്റി ഫാ. ഡോ. ജോണ്‍സ് എബ്രഹാം കോനാട്ട്. അങ്ങനെ നിയമാനുസൃതം നടക്കുന്ന തെരഞ്ഞെടുപ്പില്‍ വിജയിക്കുന്നവര്‍ക്ക് ഭരണം നിര്‍വ്വഹിക്കാം. പുറത്തുനിന്നുമുള്ള റിസീവറുടെയോ മറ്റേതെങ്കിലും ഏജന്‍സിയുടെയോ മേല്‍നോട്ടത്തില്‍ തെരഞ്ഞെടുപ്പ് നടത്തണമെന്ന യാക്കോബായ വാദം കോടതി തള്ളിക്കളഞ്ഞിരിക്കെ അത് ആവര്‍ത്തിക്കുന്നത് പൊതു സമൂഹത്തില്‍ തെറ്റിദ്ധാരണ പരത്താനാണ്. ഓര്‍ത്തഡോക്സ് സഭ ആര്‍ക്കും ആരാധനാ സ്വാതന്ത്യ്രം നിഷേധിക്കുന്നില്ല. എന്നാല്‍ നിയമാനുസൃതമായി നിയോഗിക്കപ്പെടുന്ന വൈദികര്‍ക്കും അവര്‍ അനുവദിക്കുന്നവര്‍ക്കും മാത്രമെ ആരാധനയ്ക്ക് കാര്‍മ്മീകത്വം വഹിക്കാന്‍ അവകാശമുള്ളൂ. ശബരിമലയിലും ഗുരുവായൂരിലും മറ്റ് ദേവാലയങ്ങളിലുമൊക്കെ നിയമാനുസൃതമായി നിയോഗിക്കപ്പെടുന്നവര്‍ക്ക് മാത്രമാണല്ലോ കാര്‍മ്മീകരാകാനുള്ള അവകാശം സിദ്ധിക്കുന്നത്.