മലങ്കരസഭയുടെ അങ്കമാലി ഭദ്രാസന ആസ്ഥാനമായ ആലുവ ത്രിക്കുന്നത്ത് സെമിനാരിപള്ളി കനത്ത സുരക്ഷാ സന്നാഹങ്ങള്‍ക്കിടയില്‍ തുറന്നു,സെമിനാരിയില്‍ കബറടങ്ങിയിട്ടുള്ള നാല് സഭാ പിതാക്കന്മാരുടെ ഓര്‍മപ്പെരുന്നാളിനോടനുബന്ധിച്ചു ഹൈക്കോടതി നിര്‍ദേശപ്രകാരം ജില്ലാ കലക്‌ടറാണു പള്ളി തുറന്നത്‌.രാവിലെ ഏഴുമുതല്‍ സഭയിലെ വൈദികരും വിശ്വാസികളും പത്തുപേരടങ്ങുന്ന സംഘമായി പള്ളിയില്‍ പ്രവേശിച്ചു പ്രാര്‍ഥന നടത്തി. ധൂപപ്രാര്‍ഥനയ്‌ക്കു പരിശുദ്ധ ബസേലിയോസ്‌ മാര്‍ത്തോമ്മാ പൗലോസ്‌ ദ്വിതീയന്‍ കാതോലിക്ക ബാവ നേതൃത്വം നല്‍കി.
സുന്നഹദോസ്‌ സെക്രട്ടറി മാത്യൂസ്‌ മാര്‍ സേവേറിയോസ്‌, വൈദിക സെക്രട്ടറി ഫാ. ജോണ്‍സ്‌ ഏബ്രഹാം കോനാട്ട്‌, യൂഹാനോന്‍ മാര്‍ തേവോദോറോസ്‌, യൂഹാനോന്‍ മാര്‍ പോളികാര്‍പ്പോസ്‌, ഫാ. മത്തായി ഇടയനാല്‍ കോര്‍ എപ്പിസ്‌കോപ്പ, അല്‍മായ ട്രസ്‌റ്റി ജോര്‍ജ്‌ മുത്തൂറ്റ്‌ തുടങ്ങിയവര്‍ സംബന്ധിച്ചു. പതിനൊന്നു മണിയോടെ ആരാധനാച്ചടങ്ങുകള്‍ അവസാനിച്ചു. തുടര്‍ന്ന്‌ അഖില മലങ്കര യുവസംഗമം നടന്നു.യുവജനപ്രസ്ഥാ സമ്മേളനത്തില്‍ ഫാ. ജേക്കബ് ചന്ദ്രത്തില്‍ ഫാ. സ്റീഫന്‍ വര്‍ഗീസ്, ജോണ്‍ ഉമ്മന്‍ തുടങ്ങിയവര്‍ പ്രസംഗിച്ചു. അങ്കമാലി ഭദ്രാസനാധിപന്‍ യൂഹാനോന്‍ മാര്‍ പോളിക്കാര്‍പ്പോസ് ‘കൊടിയിറക്കല്‍’ ചടങ്ങ് നിര്‍വ്വഹിക്കുകയും സെമിനാരിപ്പള്ളിയുടെ താക്കോല്‍ കളക്ടര്‍ ഡോ. എം. ബീനയില്‍ നിന്ന് സ്വീകരിച്ചുകൊണ്ട് സഹകരിച്ച എല്ലാവര്‍ക്കും നന്ദി പ്രകാശിപ്പിക്കുകയും ചെയ്തതോടെ പെരുന്നാള്‍ ചടങ്ങുകള്‍ സമാപിച്ചു.
ഉച്ചയ്‌ക്ക് ഒരുമണിയോടെ യാക്കോബായ വിഭാഗത്തിനു പ്രവേശനം അനുവദിച്ചു. ഹൈക്കോടതി നിയോഗിച്ച അഭിഭാഷക കമ്മിഷന്‍ അഡ്വ. ശ്രീലാല്‍ വാര്യര്‍ സ്‌ഥിതിഗതികള്‍ നിരീക്ഷിച്ചു.
Image Courtesy : Mathrubhumi.com
